Ташкенттегі OCTAGON 86 турнирі сенсациямен басталды
Ташкентте өткен OCTAGON 86 турнирінің алғашқы айқасы күтпеген нәтижемен аяқталып, көрермендерді таң қалдырды, деп хабарлайды Prosports.kz.
OCTAGON 86 турнирі аясында өткен кештің старттық жекпе-жегінде қырғызстандық Бекбол Исаков небәрі 48 сағат бұрын шақырту алып, өзбекстандық Диёрбек Рустамалиевпен кездесті. Бірінші раундта жергілікті спортшы басымдық танытқанымен, шешуші сәтте бәрі өзгерді.
Исаковтың дәл тиген хай-кигі қарсыласын нокдаунға жіберіп, артынша ол тұншықтыру әдісімен жеңісті жұлып алды. Осылайша кештің алғашқы жекпе-жегінде ірі сенсация тіркелді.
Негізгі кардта жанкүйерлерді бірнеше қызықты айқастар күтіп тұр. Камиль Карате атанған Камариддин Хасанов пен өзбек файтері Огабек Абдумуминов арасындағы супержекпе-жек басты оқиға болмақ.
Айта кетелік, сонымен қатар ко-мейн ивентте қазақстандық Тазабек Баянов жеңіліссіз рекордын сақтап қалу үшін тәжірибелі қарсылас Бобур Абдулазизовпен кездеседі.