Грант Доусон Нурмагомедовтың UFC-дегі ықтимал қарсыластарын атады

Грант Доусон Усман Нурмагомедов UFC-ге ауысқан жағдайда кімдермен жекпе-жек өткізуі мүмкін екенін атады, деп хабарлайды Prosports.kz.

Америкалық аралас жекпе-жек шебері Грант Доусон PFL-дің жеңіл салмақтағы чемпионы Усман Нурмагомедов UFC-ге ауысқан жағдайда кездесуі мүмкін қарсыластары туралы пікір білдірді. Бұл туралы MMAJunkie жазды.

Доусонның пікірінше, 28 жастағы ресейлік спортшыға бірден танымал қарсылас беру керек. Ол ең лайықты үміткерлер ретінде Макс Холлоуэй, Чарльз Оливейра және Арман Царукянды атады. Алайда бұл уақытта Царукян чемпиондық белбеуге ие болмауы тиіс.

Сонымен қатар Доусон UFC Нурмагомедовқа бірден чемпиондық жекпе-жек ұсынуы мүмкін екенін де жоққа шығармады. Оның айтуынша, промоушен бұған дейін де осындай тәжірибені қолданған.

Бұған дейін UFC басшысы Дана Уайт жеңіліс көрмеген Нурмагомедовпен келісімшарт жасасуға қызығушылық бар екенін растаған еді. Усманның кәсіби рекорды – 22 жеңіс, 0 жеңіліс және 1 жекпе-жек өтпеді деп танылған.