Қазақстандық ММА файтері Жаңа жыл қарсаңында Жапония жұлдызын жеңді

Қазақстандық ММА файтері Қаршыға Дәуітбек Prosports.kz сайтына 31 желтоқсан күні Жапонияда өткізген жекпе-жегі туралы айтып берді.

«Жекпе-жекке шығып, ауыр шайқаста жеңіске жеттім. Төрешілер жеңісті бірауыздан маған берді. Барша қазақстандықтарға жеңіс сыйлағаныма қуаныштымын», – деді танымал файтер.

Айта кетейік, 2024 жылдың соңғы күні Дәуітбек (17-3) Жапонияның Сайтама қаласында өткен RIZIN 49: Decade турнирінде жергілікті файтер Рен Сугиямамен (1-2) кездескен болатын. Сугияма бұрын өз салмағында әлемнің үздік бес кикбоксшысының қатарына кірген.

Қаршыға қатарынан тоғызыншы жеңісіне қол жеткізіп, 2024 жылғы төрт жекпе-жегінде де жеңіске жетті.