Алматы қаласында UFC GYM ресми ашылды
Ерекше фитнес-қоғамдастығы және аралас жекпе-жек әлеміндегі белді промоушен - UFC-дің серіктесі Қазақстанға да келіп жетті, деп жазады Prosports.kz.
UFC GYM спорт залының ашылу салтанаты Алматы қаласындағы «Алма-Ата» сауда үйінде (Назарбаев к. 223) өтті. Салтанат сәтінде ұйымдастырушылар бірнеше бағалы сыйлықтар ойнатып, дастархан жайып, келген қонақтарға сый-құрмет көрсетті.
Шараға қатысушылар сәттілік дөңгелегін айналдыру арқылы залда бір айлық тегін жаттығу мүмкіндігіне ие болды. Онымен қоса, тәжірбиелі бапкерлер кез-келген адамның қатысуымен өтетін ақысыз бірнеше жаттығу дәрісін ұсынды.
Сонымен қатар, әртүрлі жаттығу құралдарында үздік нәтиже көрсеткен қонақтарды да бағалы сыйлықтармен қуантты.
Ашылу салтанатына UFC-де бақ сынап жүрген қазақ файтері Бекзат Алмахан қатысты. UFC GYM вице-президенті Дэни Оливер салтанатты мерекемен құттықтады.
Айта кетейік, заманауи Precor және HOIST сияқты жетекші американдық брендтердің жоғары сапалы технологиялық жабдықтарымен қамтамасыз етілген залдың бастапқы бағасынан 5, 10 және 15 пайыздық жеңілдіктер қарастырылған.