Өзін Леброн Джеймстің ұлымын деген ер адам баскетболшының үйінің жанында ұсталды
«Филадельфия» шабуылшысы Леброн Джеймс Лос-Анджелестегі үйінің маңында болған оқиғаға қатысты алғаш рет пікір білдірді, деп хабарлайды Prosports.kz.
Белгісіз ер адам өзін әйгілі баскетболшының ұлымын деп таныстырып, оның үйінің маңында жүргені үшін полиция қызметкерлерінің қолына түскен.
«Отбасым қауіпсіз жерде. Мен үшін ең маңыздысы – осы. Қазір болған оқиғаның барлық мән-жайын анықтап жатырмыз», – деді Джеймс. Оның сөзін журналист Крис Рим келтірді.
Оқиға 6 қарашада Лос-Анджелестің беделді Брентвуд ауданында болған.
ESPN мәліметінше, қауіпсіздік қызметкерлері бейнебақылау камераларының жазбаларын тексеру кезінде күдікті адамды байқап, полиция шақырған. Оқиға орнына келген тәртіп сақшылары ер адамды аңдуға күдікті ретінде ұстады.
TMZ басылымының хабарлауынша, ұсталған азамат айналасындағыларға өзін Леброн Джеймстің ұлы екенін айтқан. Алайда ол баскетболшының үйіне кіре алмаған.
Оқиға кезінде Джеймстің өзі Кливленд қаласында болған. Сол күні «Филадельфия» жергілікті командамен кездесіп, 95:119 есебімен жеңіліп қалды.
