Юлия Путинцева Уханьдағы WTA-1000 турнирінің келесі кезеңіне өтті

Қазақстандық теннисші Юлия Путинцева Қытайдың Ухань қаласында өтіп жатқан WTA-1000 санатындағы турнирде өнерін жалғастырады, деп хабарлайды Prosports.kz.

Әлемдік рейтингте 79-орында тұрған Путинцева алғашқы кездесуінде Түркия өкілі, рейтингтің 59-сатысындағы Зейнеп Сёнмезді жеңді. Матч 6:7 (1:7), 6:3, 7:5 есебімен қазақстандық спортшының пайдасына аяқталды.

Кездесу 2 сағат 51 минутқа созылды. Путинцева бірде-бір эйс жасамай, бір рет қос қателік жіберді. Ол қарсыласының сервисін алу үшін берілген 16 мүмкіндіктің жетеуін пайдаланды.

Сёнмез де эйс жасай алмады. Түркиялық теннисші төрт рет қос қателік жіберіп, тоғыз брейк-пойнттың бесеуін сәтті жүзеге асырды.

Келесі кезеңде Юлия Путинцева ресейлік Диана Шнайдермен кездеседі.