«Интер Майами» тарихта алғаш рет Campeones Cup чемпионы атанды

АҚШ-тың Флорида штатындағы Майами қаласында өткен кездесуде жергілікті «Интер Майами» Мексиканың «Крус Асуль» командасын 2:0 есебімен жеңді. Осылайша, Флорида клубы тарихында алғаш рет Кампеонес Cup трофейін иеленді, деп хабарлайды Рrosports.kz.

Матчтың алғашқы минуттарынан-ақ қос команда белсенді ойын көрсетуге тырысты. Алайда есепті бірінші ашқан «Интер Майами» болды. Кездесудің 24-минутында аргентиналық шабуылшы Лионель Месси қарсылас қақпасын дәл көздеп, командасын алға шығарды. Бұл голға уругвайлық шабуылшы Луис Суарес нәтижелі пас берді.

Бірінші голдан кейін «Крус Асуль» есепті теңестіруге бірнеше рет мүмкіндік іздеді. Мексикалық клуб шабуылды күшейткенімен, «Интер Майами» қорғаныста сауатты ойнап, қарсыласына қауіпті сәттерді көп жасауға мүмкіндік бермеді.

Кездесудің екінші бөлігінде алаң иелері есепті сақтап қана қоймай, басымдықтарын арттыруға ұмтылды. Нәтижесінде ойынның 81-минутында «Интер Майами» екінші голын соқты. Бұл жолы Лионель Месси нәтижелі пас беріп, ал гол авторы бразилиялық жартылай қорғаушы Каземиро болды.

Қорытынды есеп — 2:0. «Интер Майами» қарсыласын жеңіп, Campeones Cup тарихындағы алғашқы чемпиондық атағын алды.

Айта кетейік, Campeones Cup — MLS пен Мексиканың Liga MX лигалары арасындағы жыл сайын өтетін бір матчтық турнир. Жарыста MLS чемпионы мен Мексиканың чемпиондар арасындағы турнир жеңімпазы кездеседі. Өткен жылы Campeones Cup трофейін мексикалық «Толука» клубы жеңіп алған болатын.