«Реал» мен «Барселона» Холандты трансферлік мақсатқа айналдырды

Мадридтік «Реал» мен «Барселона» 2027 жылдың жазында шабуыл шебін күшейту үшін Эрлинг Холандты қарастырып отыр. Испаниялық алпауыттар «Манчестер Сити» шабуылшысының жағдайын бақылауда, деп хабарлайды Prosports.kz.

TEAMtalk мәліметінше, қос клуб та норвегиялық шабуылшы бір жылдан кейін команда ауыстыруды ойластыруы мүмкін деген болжамды жоққа шығармайды. Алайда қазіргі таңда Холандтың ағылшын клубынан кетуге ниеті байқалмайды.

2025 жылдың басында футболшы «Манчестер Ситимен» тоғыз жылға жаңа келісімшарт жасасты. Сол кезде клуб өкілдері жаңа келісімнен бұрынғы шарттарда болған бекітілген өтемақы сомасына қатысты тармақтардың алынып тасталғанын мәлімдеген.

Дегенмен «Реал» мен «Барселонаға» жақын дереккөздер қазіргі келісімде Холандтың болашақта клуб ауыстыруына мүмкіндік беретін белгілі бір тетіктер сақталуы мүмкін екенін айтып отыр.

Сондай-ақ шабуылшы мен «Манчестер Сити» басшылығы оның болашағына қатысты ортақ түсінікке келген. Егер норвегиялық футболшы өзіне жаңа сынақ қажет деп шешсе, клуб мұндай сценарийді қарастыруға дайын.

Әзірге Холанд «Ситиге» адалдығын сақтап, жақын арада кетуі мүмкін дегенге негіз беріп отырған жоқ. Испанияның екі алпауытына ауысуы туралы тұрақты қауесеттерге қарамастан, шабуылшы ағылшын командасы сапында өнер көрсетіп келеді.