LFA 225 турнирінде сирек кездесетін жағдай орын алды

АҚШ-тың Кентукки штатында өткен LFA 225 турнирінде жанкүйерлер сирек кездесетін 4 секундтық нокауттың куәсі болды, деп хабарлайды Prosports.kz.

Орта салмақтағы Дэвид Райт пен Джейк Вудли арасындағы жекпе-жек небәрі бірнеше секундқа ғана созылды. Вудли кездесудің алғашқы сәтінде-ақ жойқын оң қолымен қарсыласын ауыр нокаутқа жіберді.

Шешуші соққы шамамен екінші секундта дәл тисе, төреші жекпе-жекті төртінші секундта тоқтатты. Осылайша бұл кездесу аралас жекпе-жек тарихындағы ең жылдам нокауттардың бірінің қатарына енді.

Айта кетелік, мамандардың пікірінше, егер нокаут уақыты төрешінің тоқтатуынан емес, шешуші соққы тиген сәттен есептелсе, рекордтық көрсеткіш бұдан да жылдам болар еді.