«Барыс» жүйесіндегі клуб жаңа лиганы қарастырып жатыр
Астаналық «Барыс» жүйесіне кіретін «Номад» клубы жақын уақытта ВХЛ-ге ауысуы мүмкін, деп хабарлайды Prosports.kz.
Мәліметке сәйкес, клуб басшылығы бұл нұсқаны белсенді түрде қарастырып жатыр.
ВХЛ-ге өту «Барыс» жүйесі үшін маңызды қадам болуы мүмкін. Себебі бұл лига қарқыны жоғары, қатаң әрі бәсекесі күшті чемпионаттардың бірі саналады.
Мұндай деңгейдегі тұрақты матчтар қазақстандық жас хоккейшілердің нақты мүмкіндігін бағалауға және оларды әлем чемпионаттары алдында ұлттық құрамаға жақсырақ дайындауға көмектеседі.
Қазіргі таңда «Номад» Қазақстан чемпионатында айтарлықтай қиындықсыз жеңіске жетіп жүр.
Алайда бұл шешімнің кері тұстары да бар. Егер «Номад» ВХЛ-ге өтсе, Қазақстан чемпионаты өзінің басты командаларының бірінен айырылады. Сонымен қатар елорданың негізгі лигада өкілі қалмайды.
Әзірге клуб басшылығы немесе федерация тарапынан ресми мәлімдеме жасалған жоқ. Бірақ ықтимал ауысу мәселесі белсенді талқыланып жатқаны айтылуда.