«Барыс» екі хоккейшісінен айырылып, сырт алаңдағы матчтарға аттанды
Астаналық «Барыс» тоғыз матчтан тұратын сырт алаңдағы серияның екінші кезеңін бастайды, деп хабарлайды Prosports.kz.
Бұл кезеңде қазақстандық клуб үш матч өткізеді:
26 қазан. «Автомобилист» – «Барыс»
28 қазан. «Динамо» (Минск) – «Барыс»
30 қазан. «Шанхай Дрэгонс» – «Барыс»
Алайда Екатеринбург – Минск – Санкт-Петербург бағытындағы сапарға «Барыс» оңтайлы құраммен аттанған жоқ.
«Мади Диханбек әлі де жарақатына байланысты ем қабылдап жатыр. Сондай-ақ Всеволод Логвин медициналық себептерге байланысты сырт алаңдағы матчтарды өткізіп алады», – деп хабарлады астаналық клубтың баспасөз қызметі.
Мади Диханбек биылғы тұрақты чемпионатта небәрі екі матчқа қатысып, бір нәтижелі пас берген.
Ал Всеволод Логвин 13 кездесуде мұз айдынына шығып, 12 (4+8) ұпай жинаған.
