«Астана Арена» стадионының реконструкциясы аяқталды
Астаналық мәслихат төрағасы Ерлан Каналимовтың айтуынша, «Астана Арена» стадионындағы реконструкция жұмыстары аяқталып, халықаралық матчтарды қабылдауға дайын.
«Астана Арена» стадионы реконструкциядан кейін халықаралық матчтарды өткізуге дайын. Қазіргі таңда UEFA талаптары мен ұсыныстарын ескере отырып, барлық құрылыс-монтаж жұмыстары аяқталды. Атап айтқанда, ескі жабындылар, алаңды жылыту және суару жүйелері толығымен ауыстырылып, сондай-ақ жасанды газон жаңартылды. Өткен жылдың желтоқсан айында футбол алаңы UEFA стандарттарына сәйкес сертификаттаудан өтіп, халықаралық сертификатқа ие болды.
Сонымен қатар, елордалық мәслихаттың қолдауымен бастапқыда мемлекеттік-жекеменшік әріптестік (МЖӘ) механизмі арқылы жүзеге асырылған «Қазақстан» спорт сарайын қайта жаңғырту жұмыстары басталды. Қазіргі уақытта тиісті құжаттарды рәсімдеу бойынша жұмыстар жүргізілуде. Құрылыс-монтаж жұмыстарын биыл бастау жоспарланып отыр. Жобаны аяқтау және нысанды пайдалануға беру 2026 жылға жоспарланған. Бұл жоба су спорты түрлерін, мәнерлеп сырғанауды дамытуға және елорда тұрғындарының белсенді демалысы үшін қолайлы жағдай жасауға бағытталған», — деді Каналимов өз инстаграм парақшасында.
Естеріңізге сала кетейік, стадионның реконструкциясы 2023 жылдың желтоқсанында басталған болатын. Осы уақыт аралығында Қазақстан ұлттық құрамасы мен «Астана» өз ойындарын Алматыдағы Орталық стадионда өткізді.