Елдос Сметов: Токио төрінде топ жаруға тырысамын
Халықаралық Олимпиада комитеті «Олимпиадалық ынтымақтастық» бағдарламасы аясында спортшыларға тағайындалған стипендиялар Токио Олимпиадасына дейін жалғасады.
Рио Олимпиадасының күміс жүлдегері Елдос Сметов осындай жағдайда спортшыларды қолдап, стипендияға лайық тапқаны үшін ХОК, ҰОК және дзюдо федерациясына алғысын білдірді.
«Ассалаумағалейкум, Қазақ елі!
Баршаңызды бүгінгі мерекемен шын жүректен құттықтаймын! Мереке қарсаңында ақжолтай хабар жетіп отыр.
Өздеріңіз білетіндей, Olympic Solidarity бағдарламасы аясында Халықаралық Олимпиада комитетінің стипендиясына ие болған едім.
Токио Олимпиадасының шегерілуіне байланысты ХОК талантты спортшыларды қолдау мақсатында бізді әрі қарай стипендияға лайық көріпті.
Әлемде болып жатқан жағдайды ескере отырып, әрдайым спортшылармен бірге болғаны үшін ХОК пен еліміздің Ұлттық Олимпиадалық комитетіне, федерацияға алғыс айтамын.
Үміттеріңізді ақтап, Токио төрінде топ жаруға барымды саламын!», - деген ол өзінің инстаграм желісінде.
Естеріңізге сала кетейік, 2018 жылы Халықаралық Олимпиада комитеті «Олимпиадалық ынтымақтастық» бағдарламасы аясында қазақстандық талантты 24 спортшы олимпиадалық стипендияға тағайындалған болатын.
