Лондондық клуб трансферлік науқанда белсенді болмақ

«Арсенал» маусым аяқталғаннан кейін және Чемпиондар лигасының финалында «ПСЖ»-дан жеңілген соң трансфер нарығында белсенді жұмыс істеуді жоспарлап отыр, деп хабарлайды Prosports.kz.

Журналист Джейми Дикенсонның мәліметінше, клуб басшылығы құрамды күшейту үшін 345 миллион еуроға дейін қаржы бөлуге дайын.

Бұл соманың шамамен 200 миллион еуросы «Астон Вилланың» жартылай қорғаушысы Морган Роджерс пен «Борнмуттың» шабуылшысы Эли Крупиді сатып алуға қарастырылған.

Қосымша 145 миллион еуро қорғаныс пен жартылай қорғаныс шебін күшейтуге жұмсалуы мүмкін.

Алайда бұл қаражаттың пайдаланылуы футболшыларды сатудан түсетін табыс пен клубтың қаржыландыру мүмкіндігіне байланысты болады.

Бұған дейін журналист Дэвид Орнштейн «Арсеналдың» негізгі трансферлік мақсаттарының қатарында орталық шабуылшы, сол қапталдағы шабуылшы, бірнеше жартылай қорғаушы және оң қаптал қорғаушысы бар екенін хабарлаған.

Өткен маусым лондондық клуб үшін соңғы жылдардағы ең сәтті кезеңдердің бірі болды.

«Арсенал» өз тарихында екінші рет Чемпиондар лигасының финалына шықты және 2004 жылдан бері алғаш рет Англия Премьер-лигасының чемпионы атанды.

Микель Артета шәкірттері маусымды 85 ұпаймен аяқтады.