Волейболдан ел чемпионаты: «Жетісу» жеңімпаз атанды
Өскемен қаласында волейболдан әйелдердің ұлттық лига командалары арасында Қазақстан чемпионаты мәресіне жетті, деп хабарлайды Prosports.kz
Алаң иелері «Берел» мен «Жетісу» (Талдықорған) клубтары чемпиондық атақ үшін үшінші, шешуші кездесуін өткізді.
Осыған дейін талдықорғандықтар ел біріншілігінде сегіз рет үздік атанған еді. Олар соңғы рет 2020 жылы жеңімпаз болды. Ал құрылғанына көп болмаған «Берел» өткен жылы күміс жүлдені қанағат тұтқан еді.
Бұл жолы бірінші партияда Ришат Гилязутдинов жаттықтыратын өскемендіктер сәтті ойнады – 25:22. Алайда осыдан кейін сербиялық маман Марко Гршичтің шәкірттері өздерінің шеберліктерінің басым екендігін дәлелдеді. Команда капитаны, украиналық Карина Денисова бастаған жетісулықтар чемпиондыққа тән өнер көрсете білді – 25:19, 25:12, 25:20.
«Берел» екінші жыл қатарынан күміс медальға ие болса, «Қуаныш» үздік үштікті түйіндеді.
Өткен жылғы ел чемпионы «Тұран» (Түркістан) төртінші орынға табан тіреді.