ҚПЛ-дың топ-клубы италиялық шабуылшыға көз тігіп отыр

Prosports.kz сайтына белгілі болғандай, румыниялық ФКСБ-ның (бұрынғы «Стяуа») италиялық шабуылшысы Андреа Компаньоға қазақстандық «Ақтөбе» футбол клубы қызығушылық танытып отыр.

Компаньо 27 жаста, А сериясында өнер көрсететін «Торино» клубының түлегі (бойы 195 см), ФКСБ сапында 2022 жылдың жазынан бастап өнер көрсетеді. Клуб футболшыны «Университати» командасынан 1,5 миллион еуроға сатып алған болатын. Румынияға ауысқанға дейін ол Италияның төменгі лигасының бірқатар клубтарында, сондай-ақ Сан-Мариноның «Тре Фьори» командасында ойнаған еді. 2023/2024 жылғы Румыния Суперлигасының 18 матчында 4 гол соқты.

Transfermarkt ойыншыны 2,3 миллион еуроға бағалап отыр. Оның ФКСБ-мен келісімшарты биыл маусым айының соңында аяқталады. Бұған дейін румындық БАҚ айына 20 мың еуро жалақы алатын Андреаның ФКСБ қожайыны Джиджи Бекалидің көңілінен шықпай, осы қыста кететінін хабарлаған. Сондай-ақ Бухарест клубы футболшы үшін 1 миллион еуро алуға үміттеніп отыр.