«Бернли» бас бапкері Сәтпаевты жоғары бағалады

Қазақстандық шабуылшы Дастан Сәтпаев әзірге «Бернлиге» алаңда көмектесе алмай жүр. Дегенмен команданың бас бапкері Ники Хайен жас форвардқа сенім артып отыр, деп хабарлайды Prosports.kz.

Маман Сәтпаевты маусым барысында командаға пайдасын тигізе алатын футболшылардың қатарына қосты.

Сәтпаев Чемпионшиптегі матчтардың бірінде алған жарақатынан кейін қалпына келіп келуде. 18 жастағы ойыншы халықаралық үзілістен кейін командаға оралады деп күтілуде.

Қазақстандық футболшының болашағы туралы айтқан Хайен оның шабуылда қауіп төндіре алатынын ерекше атап өтті. «Бернли» бапкерінің пікірінше, Сәтпаевтың жасы оның матчтарға қатысуына кедергі болмауы керек. Себебі шабуылшыда қажетті ойын тәжірибесі бар.

Сонымен қатар Хайен ағылшын клубының тығыз ойын кестесіне назар аударды. «Бернли» чемпионатта 46 матч өткізеді, оған қоса кубоктық кездесулер бар. Сондықтан маман маусым барысында құрамдағы барлық ойыншыны белсенді пайдалануды жоспарлап отыр.

Хайеннің айтуынша, осынша көп матчта футболшыларға барынша жоғары жүктемені тұрақты түрде көтеру қиын. Сол себепті бапкерлер штабында әр позицияға бірнеше нұсқа болып, ойын уақытын футболшылар арасында дұрыс бөлуі қажет.

Хайен дәл осы жүйеде Сәтпаевқа орын бар деп санайды. Бапкердің пікірінше, қазақстандық футболшы командаға нәтиже әкеле алатын ойыншылардың қатарында. Әр футболшы өз мүмкіндігін пайдаланып, құрамда маңызды рөл атқаруы тиіс.

Еске салайық, Сәтпаев Чемпионшиптегі матчтардың бірінде жарақат алған. Қалпына келгеннен кейін қазақстандық шабуылшы ағылшын клубындағы ойын уақыты үшін қайтадан таласа алады.