Голубев пен Недовесов Швейцариядағы жарыстың финалына шыға алмады

Қазақстандық теннисшілер Александр Недовесов пен Андрей Голубев Базель (Швейцария) ATP 500 турнирінің финалына шыға алмады.<br /><br />Қазақстандық жұп жартылай финалда хорватиялық Иван Додиг – америкалық Остин Крайчекпен шеберлік байқасты. Бірінші партия барысында брейк жасаған хорватиялық-америкалық жұп таразы басын өздеріне аудара білді – 6:3. Осы жағдай екінші сетте де қайталанды – 6:4.

Жалпы, бұл дода Голубев пен Недовесов үшін табысты болды деуге болады. Олар өз спорттық жолында жұптық сында алғаш рет ATP 500 турнирінің жартылай финалына дейін жетті.

Сондай-ақ осы Швейцариядағы жарыста Қазақстанның бірінші ракеткасы Александр Бублик әлемнің тоғызыншы ракеткасы канадалық Феликс Оже-Альяссимге 2:6, 3:6 есебімен ұтылып қалды.