Скатов Қазақстанның басымдығын арттырды

Қазақстандық теннисші Тимофей Скатов Дэвис кубогының Екінші әлемдік тобы аясында Таиландқа қарсы кездесуде ұлттық құрамаға екінші ұпайды сыйлады, деп хабарлайды Prosports.kz.

Касидит Самрейге қарсы кездесу 1 сағат 49 минутқа созылды. ATP рейтингінде 198-орында тұрған Скатов Таиландтың әлемдегі 387-ракеткасын жеңу үшін екі сет жеткілікті болды. Бірінші партия 6:4 есебімен аяқталса, екінші сетте жеңімпаз тай-брейкте анықталды – 7:6.

Скатовтың жеңісінен кейін Қазақстан құрамасы командалық кездесуде 2:0 есебімен алға шықты. Бұған дейін Александр Шевченко да Максимус Джонсты үш сетте – 6:4, 1:6, 7:5 есебімен жеңіп, команда қоржынына алғашқы ұпайды салған еді.

Осылайша, Қазақстан құрамасы Таиландты жеңуге бір қадам қалды. Командалар Астанада кездесіп жатыр. Жалпы бес матч жоспарланған: төрт жекелей және бір жұптық кездесу.

Кездесулер 19 қыркүйекте жалғасады. Серия қорытындысы бойынша 2027 жылғы Дэвис кубогының Бірінші әлемдік тобының плей-офф кезеңіне қатысатын команда анықталады.