Джейсон Джексон: мен Махачевті жеңе алатыныма шынымен сенемін
Bellator-дың бұрынғы чемпионы Джейсон Джексон UFC-ге ауысуды көздеп отыр, деп хабарлайды Prosports.kz.
Бұған қоса, спортшы қазірдің өзінде ұйымның жартылай орта салмақтағы қазіргі чемпионы Ислам Махачевпен жекпе-жек өткізуді мақсат етіп қойған.
Ямайкалық файтер ресейлік спортшыны жеңе алатынына сенетінін ашық айтты. Джексонның пікірінше, оған мұндай сенімді Махачевтің Иэн Мачадо Гэрриге қарсы жекпе-жектегі өнері беріп отыр. Bellator-дың бұрынғы чемпионының айтуынша, ол Гэрримен залда бірнеше рет бірге жаттыққан.
Сонымен қатар ямайкалық Ярослав Амосовты жеңгенін еске салды. Джексонның бағалауынша, Амосов дайындық деңгейі жағынан Махачевтен мықты.
«Мен UFC-ге барғым келеді және бұл мәселені айналып өткім келмейді. Мен Махачевті жеңе алатыныма шынымен сенемін. Ол Иэнмен жекпе-жекте белгілі бір қиындықтарға тап болды. Мен Иэнді құрметтеймін, бірақ жаттығу кезінде оны өзім бірнеше рет партерге түсірдім және ешқандай қиындық көрмедім.
Сондай-ақ Ярославпен не істегенімді еске аламын. Менің ойымша, ол Махачевтен мықты. Сондықтан өз мүмкіндігімді жақсы білемін», – деді Джексон.
Сонымен қатар 35 жастағы спортшы оның UFC-ге ықтимал ауысуы дивизиондағы күштердің арақатынасын айтарлықтай өзгертуі мүмкін деп санайды. Джексон ұйым басшылығы оны дәл осы себепті келісімшартқа алуға асықпай отырған болуы мүмкін деп топшылайды. Өйткені ол басқа ұйымнан келген бойда рейтингтің жоғарғы сатысындағы қалыптасқан тәртіпке араласатын қауіпті қарсыласқа айналуы мүмкін.
«Меніңше, матчмейкерлер дәл осыны қаламайды. Басқа ұйымнан менің жасымдағы файтер келіп, бірден олар құрған иерархияны бұзып жібергенін елестетіп көріңіз. Сондықтан менің UFC-ге ауысуым созылып жатқан шығар деп ойлаймын», – деп қосты Джексон