Әлімханұлы әлем чемпионы атағын екінші рет қорғағаннан кейін жекпе-жектен шеттетілді

Калифорния штатының атлетикалық комиссиясы орта салмақтағы WBO белбеуін сарапқа салған қазақстандық Жәнібек Әлімханұлы (14-0, 9 КО) мен канадалық Стивен Батлерге (32-4-1, 26 КО) қатысты шешім қабылдады, деп хабарлайды Prosports.kz.

Boxrec.com порталының мәліметінше, Әлімханұлы 20 мамырға дейін, Батлер - 27 маусымға дейін жекпе-жектерден шеттетілді. Бұл шара спортшылардың толық қалпына келуі үшін жасалып отыр.

14 мамыр күні таңертең Жәнібек Әлімханұлы Стоктон қаласында (Калифорния, АҚШ) Стивен Батлерді екінші раундта нокаутқа түсіріп, жеңіске жеткен болатын.

Осылайша, Жәнібек Әлімханұлы кәсіпқой бокстағы он төртінші жекпе-жегінде жеңіске жетіп, WBO тұжырымы бойынша әлем чемпионы атағын сәтті қорғаса, Стивен Батлер карьерасында төртінші рет жеңіліп қалды. Ал Әлімханұлы екінші рет титулын қорғап қалды.

Фото instagram.com/janibek_alimkhanuly