«Жеңіс те, жеңіліс те Аллаһтың қалауымен». Жалғас Жұмағұлов жанкүйерлеріне жолдау жариялады

Қазақстандық файтер Жалғас Жұмағұлов жанкүйерлеріне жолдау жариялады, деп хабарлайды Prosports.kz.

«Мені қолдағандарыңызға көп рахмет. Ештеңе етпейді. Мен одан мықты болып ораламын, әлі-ақ дәлелдеймін. Барлық жеңістер мен жеңілістер Аллаһтың қалауымен, сондықтан бәрі дұрыс. Денсаулығым жақсы, жарақатым жоқ. Мен осындай қиын сәтте елді қуантқым келді, бірақ нәтиже болмады. Әрбір сынақтың артында жеңілдік бар. Сондықтан біз өз еліміз бен халқымыз үшін жеңілдік күтеміз. Бауырлар, шыдамдылық танытып, бір-бірімізге көмектесейік», - деді Жалғас Arlan MMA Pro тобының Youtube арнасында жарияланған қысқа видеода.

Еске сала кетейік, UFC-дегі дебюттік жекпе-жегінде Жалғас Жұмағұлов бразилиялық Раулиан Пайвадан төрешілер шешімімен жеңіліс тапты. Рас, бұл шешім MMA сарапшылары мен жанкүйерлерінің арасында күмән туғызды, олардың көпшілігі қазақстандық файтердің жеңісіне сенімді.