ҚХЛ: «Барыс» елордада «Сибирьге» есе жіберді

<span>Бүгін елордалық «Барыс» құрлықтық хоккей лигасындағы кезекті ойынында Ресейдің «Сибирь» (Новосібір) командасын қабылдады.</span>

<span> «Барыс» соңғы алты ойында қарсыластарының барлығынан басым түсті. Олардың қатарында көш басында келе жатқан Ресейдің ЦСКА командасы да бар. Енді елордалық клубтың төрт ойыны қалды. «Сибирь» плей-офф кезеңіне жолдама алды. </span>

<span>Қазір турнир кестесінде 57 ойыннан кейін 68 ұпай жинап, оныншы орында тұр. Ал турнир кестесінде алтыншы орында келе жатқан «Барыстың» еншісінде 58 ойыннан кейін 79 ұпай бар. Олар да плей-офф кезеңіне берілген жолдама тағдырын бірнеше тур бұрын шешіп қойған еді.</span>

<span> Соған қарамастан бүгінгі кездесу тартысты өтті. Алғашқы екі кезеңде қарсыластар бір-бірінің қақпасынан саңылау таба алған жоқ. Ал 49-минутта «Сибирь» хоккейшісі Егор Миловзоров өз командасын алға шығарған еді. Ойынның бітуіне небәрі бес секунд қалғанда «Барыс» ойыншысы Линус Виддель таразы басын теңестірді. Ойын овертаймға ұласты. </span>

<span>Кездесудің 64-минутында «Сибирь» хоккейшісі жеңіс шайбасын соғып кетті. Елордалық клуб қарсыласынан 1:2 есебімен жеңіліп қалды. Нәтижесінде «Барыстың» алты ойынға созылған жеңіс сериясы осымен тоқтады. </span>

<span>Еске сала кетсек, «Барыс» бұған дейін елордада Ресейдің «Сочи» командасынан 3:2 есебімен басым түскен еді.</span>