«Қызылжардың» бұрынғы президенті Григорий Лория халықаралық іздеуге жарияланды
«Қызылжар» футбол клубының бұрынғы президенті Григорий Лория мемлекетаралық іздеуге жарияланды, деп хабарлайды Prosports.kz.
Қаржылық мониторинг агенттігінің мәліметінше, 72 жастағы бұрынғы клуб басшысына қатысты бюджет қаражатын жымқыру және салық заңнамасын бұзу деректері бойынша қылмыстық іс тергеліп жатыр. Келтірілген болжамды шығын көлемі 414 миллион теңгеден асады.
Іздестіру шараларын агенттіктің Солтүстік Қазақстан облысы бойынша департаменті бастаған.
414 миллион теңге қалай жымқырылған болуы мүмкін?
2023 жылы жергілікті бюджеттен «Қызылжар» футбол клубын қаржыландыруға 1,7 миллиард теңге бөлінген.
Тергеу нұсқасына сәйкес, клубтың бұрынғы басшысы бас бухгалтермен және өзге де тұлғалармен бірлесіп, жалған құжаттар арқылы негізсіз төлемдер рәсімдеген. Соның нәтижесінде бюджет қаражаты жеке есепшоттарға аударылған болуы мүмкін.
Бұдан бөлек, қаржылық есептілікті бұрмалау белгілері анықталған. Атап айтқанда, салық құжаттарында қызметкерлердің жалақысы, жалпы еңбекақы қоры және ұйымның жылдық табысы әдейі төмендетіліп көрсетілген деген күдік бар.
Құзырлы органдардың бағалауынша, мемлекетке келтірілген болжамды шығын 414 миллион теңгеден асады.
Айта кетейік, Григорий Лорияның кінәсі сотта дәлелденген жоқ.
Сонымен қатар оның ұлы, Қазақстан құрамасының бұрынғы қақпашысы Давид Лория 2026 жылдың қазан айында «Әділет» партиясы атынан Астана қалалық мәслихаты депутаттығына кандидат ретінде ұсынылған.
Бұған дейін Қазақстан футбол федерациясының вице-президенті қызметін атқарған Давид Лорияның сайлауға қатысуына әкесіне қатысты қылмыстық іс кедергі болмайтынын елордалық аумақтық сайлау комиссиясы мәлімдеген.
