ҚФФ бұрынғы бас аудиторының ісі бойынша сотта жеңіліп қалды
Қазақстан футбол федерациясы бұрынғы бас аудиторы Қамбар Омаровқа қатысты сотта жеңіліп, оған шамамен 50 миллион теңге төлеуге міндеттелді, деп хабарлайды Prosports.kz.
Дереккөздің мәліметінше, Омаров федерацияда 2025 жылдың қаңтарынан бастап жұмыс істеген. Оның ай сайынғы жалақысы шамамен 2,5 миллион теңгені құраған. 2026 жылдың сәуірінде қызметкерге штат қысқаратыны туралы ескерту жасалып, мамыр айында еңбек шарты бұзылған.
Жұмыстан босатылғаннан кейін бұрынғы аудитор сотқа жүгініп, еңбек шартына қосымша келісімде қарастырылған өтемақыны талап еткен. Аталған құжат бойынша оның ҚФФ-дағы жұмыс мерзімі 2028 жылдың қаңтарына дейін ұзартылған. Сондай-ақ жұмыс берушінің бастамасымен қызметінен босатылған жағдайда, қалған кезең үшін жалақы толық төленуі тиіс болған.
Осылайша, Омаров жұмыс істемеген 20 айдың жалақысын, яғни шамамен 50 миллион теңге өтемақы талап еткен. Бұдан бөлек, ол тағы 20 миллион теңгеге жуық сыйақы алуға үміттенген.
ҚФФ бұрынғы қызметкерінің талаптарымен келіспеген. Федерация өкілдері қосымша келісімнің enbek.kz мемлекеттік жүйесінде тіркелмегенін және оның шарттары ұйым басшылығымен келісілмегенін алға тартқан.
Алайда сот отырысында ҚФФ-ның бұрынғы бас хатшысы Давид Лория сөз сөйлеп, құжаттың заңды түрде рәсімделгенін растаған. Қосымша келісімге федерация атынан дәл осы Лория қол қойған.
Нәтижесінде сот Омаровтың талап-арызын ішінара қанағаттандырып, ҚФФ-ны жұмыс істемеген кезеңі үшін жалақы төлеуге міндеттеді. Ал сыйақы төлеу туралы талабын қанағаттандырмады. Сот мұндай төлемдердің ынталандыру сипатында екенін ескерген.
Осылайша, сот шешімі заңды күшіне енді. Бұдан бөлек, федерация қосымша келісімнің жарамдылығына жеке тәртіппен дау айтқанымен, сот бұл талапты да қанағаттандырмады.
