WBO Жәнібек Әлімханұлына жаңа қарсылас тағайындады
Дүниежүзілік бокс ұйымы (WBO) орта салмақтағы вакантты әлем чемпионы атағы үшін қазақстандық Жәнібек Әлімханұлы мен даниялық Якоб Банк арасындағы жекпе-жекті ресми түрде бекітті, деп хабарлайды Prosports.kz.
Рейтингте тиісінше бірінші және үшінші орындарда тұрған боксшылардың промоутерлеріне жекпе-жек шарттарын келісу үшін 15 күн уақыт берілді. Егер осы мерзім ішінде ортақ келісімге келе алмаса, жекпе-жекті өткізу құқығы промоутерлік саудаға шығарылады.
Бастапқыда WBO рейтингінде екінші орында Диего Пачеко тұрған. Алайда ол Дариус Фулгуммен жекпе-жек өткізу үшін титулдық айқастан қайтадан бас тартты.
Чемпиондық белбеу Хамза Шираз Жәнібек Әлімханұлымен (17-0, 12 КО) рингке шығудан бас тартқаннан кейін бос қалды. Британдық боксшы гонорар көлеміне көңілі толмағанын, сондай-ақ допинг дауына қатысты жағдайдан кейін WBO-ның қазақстандық боксшыны бірден міндетті үміткер мәртебесіне қайтару туралы шешіміне наразылығын білдірді.