«Бернли» бапкері Сәтпаевтың команданы несімен таңғалдыратынын түсіндірді
«Бернли» командасының бас бапкері Ники Хайен Чемпионшиптің төртінші турында «Мидлсброға» қарсы өткен матчтан (1:1) кейін Қазақстан құрамасының шабуылшысы Дастан Сәтпаевтың команда ойынына қосқан үлесін атап өтті, деп хабарлайды Prosports.kz.
18 жастағы шабуылшы кездесуді негізгі құрамда бастап, алаңда 80 минут өткізді. Матч қорытындысы бойынша Сәтпаев ойынның үздік ойыншысы деп танылды.
Хайен құрамды жасақтау кезінде футболшының жасына емес, оның жоғары қарқынмен ойнауға және бар күшін салуға дайындығына бірінші кезекте мән беретінін атап өтті.
«Ол командаға көп энергия мен қарқындылық береді. Мен үшін жас маңызды емес. 18-де немесе 35-те болуыңыз маңызды емес. Алаңға энергия мен қарқындылық әкелсеңіз, ойнайсыз. Ең бастысы – осы. Қазір біз жастар мен кәсіби футболды жақсы білетін әрі жас ойыншыларға бағыт-бағдар бере алатын тәжірибелі футболшылардың арасындағы дұрыс тепе-теңдікті табуға тырысып жатырмыз. Біз үшін тәжірибелі ойыншылардың жастарға жеңіске жетуді үйренуге және қиын матчтардың өзінде дұрыс көңіл күйді сақтауға көмектесуі маңызды.
Сонымен қатар бізде энергиясы мен қарқындылығының арқасында тәжірибелі ойыншылардың өздеріне үлгі бола алатын жас футболшылардың болғаны қуантады. Егер осы қасиеттерді біріктіре алсақ, мықты команда құрамыз», – деді Хайен.
«Мидлсбромен» өткен матч Сәтпаев үшін «Бернли» сапындағы төртінші, ал негізгі құрамда бастаған үшінші ойыны болды. Әзірге қазақстандық шабуылшы нәтижелі әрекетімен көзге түскен жоқ.
«Бернли» келесі матчын 5 қыркүйекте өз алаңында «Бристоль Ситиге» қарсы өткізеді.