Футбол бұзақысы «Астана» клубына 2 млн теңге төлейді

Астана қаласының Алматы аудандық сотының шешіміне сәйкес футбол бұзақысы Шамсулло Файзиев «Астана» футбол клубына 1968150 теңге төлейді, деп хабарлайды www.fca.kz.

Естеріңізге сала кетсек, 2017 жылдың 23 қарашасында «Астана Аренада» өткен УЕФА Еуропа Лигасы аясында «Астана» мен «Вилльярреал» (Испания) топтық кездесуінде Файзиев Шамсулло атты көрермен алаңға жүгіріп шығып, матчты тоқтатуға тырысқан.

Бұл оқиға үшін УЕФА «Астана» футбол клубына 5000 евро мөлшерінде айыппұл салды. Осы сомаға елордалық футбол клубы Файзиев Ш.К-ға материалдық зиянды өтеу туралы талап арыз берді.

«Астана Арена» стадионында еуропалық клубы турнирлері немесе Қазақстан Кубогы ойындары кезінде енді мұндай оқиғалар қайталантын болса, «Астана» клубы немесе ҚФК бұдан да көп суммаға жазаланатын болады.