Ақ жол, Apple Team!
16 сәуірде Алматы қаласында 2017 жылғы велосипед маусымының ашылуы мен құрлықтық деңгейдегі Apple Team командасының таныстырылуы өтті.
Веложарыс таңғы 9-да басталды. Күн бұлтты болып тұрса да, «Нұрлы тау» кешенінің алдында Алматыда жаңа маусымдағы алғашқы веложарысқа қатысушылар саны көп.
Олардың қатарында жас та, кәрі де болды.
Қатысушылар өз отбасылары және достарымен келді.
Спорт жұлдыздары да қалысқан жоқ.
Қатысушылар «Нұрлы таудан» «ҚР тұңғыш президентінің атындағы саябаққа» дейін 9 шақырымды артта қалдырды. Жарыс алдында қатысушыларға арнайы нөмір берілді, соның арқасында мәре сызығында жүлдегерлер анықталып, сыйлықтар берілді. Ең негізгі сыйлық – электровелосипед.
Сиднейдегі Олимпиада ойындарының жүлдегері Ислам Байрамуков мұндай шараларға бірінші рет келіп тұрған жоқ:
- Веложарысқа екінші рет қатысып жатырмын. Былтыр маусымның ашылуында болғанмын. Кардиожаттығу жасадым, тамаша әсерде тұрмын. Басында қалып қойғанмын, ұйымдастыру мәселесі бойынша сөреде кешігіп қалдым, қуып жетуге тура келді. Жолда өзіме бір қарсылас тауып алдым, екеуіміз мәреге дейін жарысып бардық (күліп). Салауатты өмір салтын насихаттау деп осыны айту керек. Мұндай шараларды көптеп ұйымдастыру қажет.
Алматылық алғашқы кәсіпқой велокоманда ресми түрде таныстырылған соң, Apple Team менеджері Евгений Яковлев Prosports.kz тілшісіне өз пікірін айтты.
- Қаламыздың намысын халықаралық жарыстарда қорғайтын алғашқы велокоманда ашылып отыр. Бұл команда алдағы ұрпақ арасында кәсіпқой велоспорттың дамуына өз үлесін тигізеді деп үміттенеміз.
Халықаралық жарыстарға келесі жылдан бастап қатысамыз. Бірақ «Алматы туры-2017» сайысына мықты құраммен келеміз. Тайваньда, Иран мен Қытайда жүрген жігіттер оралады. Биылғы жылы Азияда Қазақстанның туымен өнер көрсетпекпіз. Жалпы айтқанда, мақсатымыз өте жоғары.
