Месси мансабын өзі тәрбиеленген аргентиналық клубта жалғастыруы мүмкін
АҚШ-тың «Интер Майами» клубында өнер көрсететін Лионель Месси мансабын туған жерінде жалғастыруы мүмкін, деп хабарлайды Prosports.kz.
Аргентиналық журналист Гонсало Кальвиджионидің мәліметінше, шабуылшы алдағы қысқы трансферлік кезеңде «Ньюэллс Олд Бойз» клубына оралу нұсқасын қарастырып жатыр. Қазіргі уақытта мұндай ауысымның ықтималдығы бұрынғыдан да жоғары екені айтылды. Дегенмен тараптар әзірге ресми келісімге келген жоқ. Футболшының өзі де команда ауыстыруы мүмкін екеніне қатысты пікір білдірмеген.
«Лионель Месси бұрын-соңды “Ньюэллс” клубына ауысуға мұншалықты жақын болған емес. Бұл 2027 жылдың қаңтарында жүзеге асуы мүмкін», – деп жазды Кальвиджиони әлеуметтік желідегі парақшасында.
Аргентиналық клубтың өз түлегін қайтаруға деген қызығушылығы бұрыннан бар. 2026 жылдың ақпанында «Ньюэллс Олд Бойз» вице-президенті Хуан Мануэль Медина жұлдызды шабуылшыны 2027 жылдың алғашқы жартысында командаға шақыру жоспары бар екенін айтқан еді. Оның сөзінше, клуб басшылығы Мессидің айналасындағы адамдармен байланысқа шығып, ықтимал ынтымақтастықты талқылаған.
Аргентиналық футболшының Росарио қаласындағы клубпен байланысы бала кезінен басталады. Ол 2000 жылы Испанияға аттанып, «Барселона» жүйесіне қосылғанға дейін «Ньюэллс Олд Бойздың» жасөспірімдер командасында жаттыққан.
2026/27 жылғы маусымда Аргентина құрамасының капитаны «Интер Майами» сапында жоғары нәтижелілік көрсетіп жүр. Оның еншісінде 34 матчта соғылған 29 гол мен 15 нәтижелі пас бар.
Айта кетейік, Мессидің америкалық клубпен қолданыстағы келісімшарты 2028 жылдың соңына дейін жарамды. Бұл оның Аргентинаға оралуына қатысты келіссөздерде маңызды фактор болуы мүмкін.
