ҚФФ «Астана Аренаға» УЕФА Суперкубогы алдында қойылатын басты талапты атады

«Астана Арена» УЕФА-ның төртінші санат талаптарына сәйкес келеді. Алайда 2028 жылы УЕФА Суперкубогын өткізу үшін стадионға қосымша дайындық жұмыстарын жүргізу қажет. Бұл туралы ҚФФ халықаралық байланыстар департаментінің басшысы Аян Әлжанов айтты, деп хабарлайды Prosports.kz.

Әлжановтың сөзінше, УЕФА елордадағы стадионмен жақсы таныс. «Астана Аренада» Қазақстан ұлттық құрамасы тұрақты түрде матчтарын өткізеді, сондай-ақ Чемпиондар лигасының кездесулері де ұйымдастырылған.

Дегенмен УЕФА Суперкубогын өткізуге қойылатын талаптар стадионда бұған дейін өткен матчтарға қойылған талаптардан жоғары болмақ. Еуропалық футбол ұйымының өкілдері аренаға арнайы инспекция жүргізіп, қандай жұмыстар атқару керектігін анықтайды.

«Астана Аренада» қазірдің өзінде жасанды жабын бар. Алайда дәл осы жабынды ауыстыру қажет. Әлжановтың айтуынша, УЕФА талаптарына сәйкес, Суперкубок матчы табиғи көгалда өтуі тиіс.

Сонымен қатар ҚФФ жабынды ауыстыруды жүзеге асыруға болады деп есептейді. Федерация стадион мен қала әкімшілігімен халықаралық матчқа аренаны дайындау мәселелері бойынша жұмыс жүргізіп жатыр.

Айта кетейік, УЕФА Суперкубогы 2028 жылы «Астана Аренада» өтуі тиіс.