«Барыс» шабуылшысы Тайс Томпсон ҚХЛ-да үздік ойыншы атанды

«Барыс» шабуылшысы Тайс Томпсон Құрлықтық хоккей лигасында ойын күнінің үздік ойыншысы атанды, деп хабарлайды Prosports.kz.

«Салават Юлаевқа» қарсы матчта шабуылшы екі шайба соғып, бір нәтижелі пас берді. Сонымен қатар Томпсон беттесулерде де жоғары көрсеткіш көрсетті. Ол жекпе-жектердің 61,1 пайызында жеңіске жетті.

Кездесу «Барыстың» 8:6 есебімен жеңісімен аяқталды. Уфа командасы үшін бұл осы тұрақты чемпионаттағы алғашқы жеңіліс болды. Оған дейін «Салават Юлаев» екі матч өткізіп, екеуінде де жеңіске жеткен. Команда сырт алаңда «Северстальді» (3:2) және «Авангардты» (4:0) ұтқан.

Ал «Барыс» жаңа маусымды «Сібірді» 7:1 есебімен сенімді жеңіп бастаған болатын.

Қазақстандық клуб келесі матчын 12 қыркүйекте өз алаңында Хабаровскінің «Амурына» қарсы өткізеді. Ал «Салават Юлаев» 16 қыркүйекте мұз айдынына шығып, Қазанның «Ак Барсын» қабылдайды.