«Алтай» өз футболшыларына қарыз болып қалды

Өскемендік «Алтай» футболшылармен есеп айырысу кезінде қаржылық қиындықтарға тап болды, деп хабарлайды Prosports.kz.

ASnews.kz басылымының мәліметінше, клуб негізгі құрам ойыншылары алдындағы міндеттемелерін толық орындамаған. Футболшылар соңғы жаз айындағы жалақысының тек жартысын алған. Ал қалған бөлігі қазан айына шегерілген.

Бұл ретте жалақысы мемлекеттік бюджеттен субсидияланатын лимиттен аспайтын футболшыларға төлем кешіктірілмеген. Сондай-ақ «Қызылжарды» 3:0 есебімен жеңгені үшін берілетін сыйақы да тек 50 пайыз көлемінде төленген.

Қазақстан чемпионатының соңғы ойындарында «Алтай» ойын бойынша елеулі қиындықтарға тап болды. Дегенмен өткен демалыс күндері команда «Қайсарды» 2:0 есебімен жеңіп, маңызды үш ұпайға қол жеткізді.

Турнир кестесінде өскемендік клубы 13-орында келеді. Команда төмендеу аймағында тұрған «Ертістен» екі ұпай алда.