Қылмыскерлер Ален Просттың үйінен қымбат заттарды ұрлап кеткен

Формула-1-дің төрт дүркін чемпионы Ален Прост Швейцарияда болған шабуыл кезінде жеңіл жарақат алып, қылмыскерлер оның үйінен қымбат заттарды ұрлап кеткен, деп хабарлайды Prosports.kz.

БАҚ мәліметінше, бетперде киген бірнеше адам таңертең ерте оның үйіне кіріп, отбасы мүшелеріне қоқан-лоқы көрсеткен. Олар ұлына сейфті ашқызған.

Шабуылшылардың мақсаты қымбат сағаттар коллекциясы болуы мүмкін деген болжам бар. Қазір олар әлі ұсталған жоқ, полиция тергеу жүргізіп жатыр.

Айта кетелік, Ален Прост Формула-1-де 1985, 1986, 1989 және 1993 жылдары чемпион атанған. Оның жағдайы шамамен 150 миллион доллар деп бағаланады.