Қазақстандық файтер 36 жастан кейін ММА-да өнер көрсетпейді

Қазақстандық ММА жауынгері Фаниль Рафиков аралас жекпе-жектегі мансабын 36 жасқа дейін жалғастыруды жоспарлап отырғанын айтты, деп хабарлайды Prosports.kz.

Қазіргі таңда 32 жастағы файтердің кәсіби рекорды — 25 жеңіс және 8 жеңіліс.

Рафиковтың сөзінше, тіпті физикалық жағдайы жақсы болса да, 36 жастан кейін ММА-да қалудың мағынасы жоқ. Ол ең алдымен денсаулығын сақтауды ойлайтынын жеткізді.

Сондай-ақ спортшының басты мақсаты өзгермегенін айтты. Оның жоспары — не 30 жеңіске жету, не 36 жасқа толу. Қайсысы бұрын болса, сол кезде шешім қабылдайды.

Алайда қазақстандық файтер қызықты ұсыныстар түссе, болашақта бокста өнер көрсету мүмкіндігін қарастыруға дайын екенін де атап өтті.