Дэвис кубогының іріктеу турнирі: Қазақстан жастары екінші матчта жеңіске жетті
Шымкент қаласында 16 жасқа дейінгілер арасында өтіп жатқан Дэвис кубогының Азия – Тынық мұхит аймағы бойынша іріктеу турнирінде Қазақстан жасөспірімдер құрамасы мерзімінен бұрын ширек финалға шықты, деп хабарлайды Prosports.kz сайты ҚазАқпарат-қа сілтеме жасап.
Қазақстандықтар D тобындағы екінші матчында Пәкістан құрамасын 3:0 есебімен жеңді.
Әуелі жекелей сында Аңсар Ниетқалиев Абубакар Талхеден айласын асырды – 7:5, 6:1.
Ізінше Ахмади Мақанов Мухаммад Хассан Усманиды қапы қалдырды – 6:2, 6:0.
Жұптық кездесуде А.Мақанов – Родион Трайгель пәкстандықтар Зохаиб Афзал Малик – А.Талхиды ұтты – 7:6 (7:4), 6:3.
Осы топта жарыс фавориттерінің бірі Оңтүстік Корея Түрікменстан құрамасын 3:0 есебімен тізе бүктірді.
Сәрсенбі күні қазақстандық жасөспірімдер Оңтүстік Корея теннисшілерімен шеберлік байқасады. Егер жеңген жағдайда өз тобынан бірінші орынмен шығып, ширек финалда А немесе В тобында екінші сатыға орныққан командамен (Гонконг немесе Өзбекстан) кездеседі.
Ал екінші орын алған жағдайда ¼ финалда фавориттер – Жапония немесе Аустралияның біріне тап болады.