Асу Алмабаев: «Бұл жай ғана жекпе-жек емес – бұл ел намысы»

Қазақстандық UFC жауынгері Асу Алмабаев өзінің мансабындағы ең маңызды шайқас қарсаңында пікір білдірді, деп хабарлайды Prosports.kz.

«Мен үшін де, Шавкат Рахмонов үшін де Қазақстанның атынан өнер көрсету – үлкен абырой. Әлемдегі №1 промоушенде көк туымызды көтеру Олимпиада алтынын жеңіп алумен тең. Бұл жай ғана жекпе-жек емес – бұл ел намысы», – деді Алмабаев.

2 наурыз күні Асу Алмабаев Лас-Вегаста өтетін UFC Fight Night 253 турнирінің басты жекпе-жегінде Анголадан келген Манел Капемен кездеседі. Ол жарақатына байланысты жекпе-жектен бас тартқан жеңіл салмақтағы рейтинг көшбасшысы Брэндон Ройвалдың орнына шығады.

Бұл шайқас қазақстандық ММА тарихында ерекше орын алады, өйткені Асу Алмабаев – UFC турнирінің басты жекпе-жегіне шыққан алғашқы қазақстандық спортшы. Бұл жеңіс оның мансабындағы жаңа белестерге жол ашуы мүмкін.