«Үздік болғың келсе, үздіктермен төбелес». OCTAGON дебютанты - титулды жекпе-жек, қарсыласы туралы

17 наурызда Алматыда қазақстандық OCTAGON промоушенінің кезекті турнирі өтеді. 

Басты кездесуде 20 жастағы проспект Карим Рузбакиев (5-0) пен промоушендегі дебютіне дайындалып жатқан Айболат Мұратұлы (2-2) жартылай ауыр салмақта чемпиондық белбеуді сарапқа салады. 

Prosports.kz тілшісі дебютантпен тілдесіп, дайындығы қалай өтіп жатқанын сұрады. 

- Айболат, 17 наурыздағы жекпе-жегіңізге дайындық қалай жүріп жатыр??

- Дайындық жақсы өтіп жатыр. Тек салмақ қуу қалды.

- Алдағы жекпе-жек сіздің OCTAGON лигасындағы дебютіңіз болады. Неліктен сіз осы промоушенде өз бағыңызды сынап көруге шешім шығардыңыз?

- Маған өзімді көрсетуге мүмкіндік берілді. «Үздік болғың келсе, үздіктермен төбелес» дегендей.

- OCTAGON промоушенінде қанша уақыт болуды жоспарлап отырсыз?

- Әзірше болашақты болжағым келмейді. Жекпе-жекті өткізейік, сосын көре жатармыз.

- Кәрім Рузбакиевпен жекпе-жекте бірден жартылай ауыр салмақта чемпион атағын жеңіп алуға мүмкіндігіңіз болып тұр, мұны қалай қабылдадыңыз?

- Кәрім - жақсы файтер. Оған кештің басты жекпе-жегіне лайық қарсылас табылмады. Менің де жасым 20-да емес, сондықтан мүмкіндік берген соң, оны пайдалануым керек.

- Жақындарыңыз карьераңыз турады не дейді?

- NFC лигасында жеңілген кезде, ұлым «Әке, сен чемпионсың, жеңілмеуің керек» деді.

- Қарсыласыңыз туралы не білесіз? Сіз оның осал және күшті жақтарын анықтай алдыңыз ба?

- Қарсыластың соққысы жақсы. Мен оның жекпе-жектерін көрдім, оған дайындаған тосынсыйымыз бар.

- Рузбакиев кәсіпқой карьерасында жеңілмеген. Бұл жағдай сізге қосымша қысым жасай ма?

- Жоқ, керісінше, сондай файтерді жеңе алатыным күш береді.

Турнирдің ресми серіктесі TURAN суы - Turan.sport, turanwater.com.

- Жекпе-жек алдында қарсыласыңызға не айтқыңыз келеді?

- Не айтамын. Жеңіс пен жеңіліс – Аллах қолында. Қай мықтысы жеңсін.