Қос балуанымыз қола медаль үшін күреседі

Будапеште (Венгрия) өтіп жатқан әлем чемпионатында 60 келі салмақтағы Айдос Сұлтанғали мен 67 келіде күрескен Меиржан Шермаханбет қола медаль үшін күреседі, деп хабарлайды Prosports.kz тілшісі күрес федерациясына сілтеме жасап.

Өкінішке қарай, екі балуанымыз да жартылай финалда ресейлік балуандардан ұтылды. Айдос финалдық жолдаманы биылғы Еуропа чемпионы Сергей Емелинмен сарапқа салып, 0:9 есебімен ұтылды. Ал, Меиржан Артем Сурковқа 1:3 есебімен есе жіберді.

Қола медаль үшін өтетін белдесулер ертең өтеді. Балуандарымыздың қарсыластары да ертең жұбаныш белдесулерден кейін анықталады.

Сондай-ақ, бүгін бозкілемге 87 келі салмақтағы Азамат Құстыбаев та шыққан еді. Азамат алғашқы белдесуінде ресейлік Бекхан Оздоевтан жеңіліп, жарыстан шығып қалды.

Өкінішке қарай, Демеу Жадраев (72 кг) пен Мақсат Ережепов (82 кг) жұбаныш белдесулерін сәтсіз өткізіп, қола медаль үшін күресуге мүмкіндік ала алмады. Демеу ресейлік Абуязид Манциговтен ұтылса, Мақсат Беларусь балуаны Виктор Сосуновскийге тізе бүкті.