Қазақстандық Отгонцэцэг моңғолиялық Уранцэцэгтен қауіптенеді

<div style="text-align: justify;"> <strong>Моңғолияда туып-өскен 24 жастағы балуан Отгонцэцэг Галбадрах Рио олимпиадасына Қазақстан атынан қатыспақ. Дзюдошы қыз &laquo;бұл жарыста бұрынғы отандасым басты қарсыласым болады&raquo; дейді.</strong></div> <div style="text-align: justify;"> &nbsp;</div> <div style="text-align: justify;"> 2015 жылы Қазақстан азаматтығын алған тегі моңғолиялық дзюдошы Отгонцэцэг Галбадрах биыл Рио-де-Жанейрода (Бразилия) өтетін жазғы олимпиада ойындарына баруға дайындалып жүр.</div> <div style="text-align: justify;"> &nbsp;</div> <div style="text-align: justify;"> Ол Қазақстанға келгенге дейін әйелдер арасында 48 килограмм салмақ дәрежесінде әлемдік рейтингте 9-орында тұрған. Оның жерлесі Уранцэцэг Мөнхбат бұл тізімде 1-орында еді. Отгонцэцэг Моңғолия ішкі біріншілігінде өткен бірнеше кездесуде Уранцэцэгтен жеңіліп қалған. Олимпиадаға 48 килограмм салмақ дәрежесінде Моңғолияның атынан баруға Уранцэцэгтің мүмкіндігі артық болғандықтан Отгонцэцэг Қазақстанның шақыруын қабыл алған. Моңғолия дзюдо федерациясы да спортшының Қазақстан атынан жарыстарға қатысуына келісімін берген.</div> <div style="text-align: justify;"> &nbsp;</div> <div style="text-align: justify;"> Отгонцэцэг Азаттыққа берген сұқбатында азаматтығын ауыстыруға не себеп болғанын түсіндірді. Орыс тілін ұғатынын, бірақ сөйлей алмайтынын айтқан дзюдошы сұхбатты моңғол тілінде берді.</div> <div style="text-align: justify;"> &nbsp;</div> <div style="text-align: justify;"> &ndash; Арманым олимпиадаға бару болды. Ата-анам Қазақстан азаматтығын алуыма қарсы болған жоқ, туысқандарым түсінді. Қазақстанға келгеніме өкінбеймін. Мені жылы қабылдаған Қазақстан жанкүйерлеріне алғысымды айтамын Қазір орысша үйреніп жүрмін, кейін қазақ тілін де үйренгім келеді, &ndash; дейді спортшы.</div> <div style="text-align: justify;"> &nbsp;</div> <div style="text-align: justify;"> 14 ЖАРЫСТАН 10 МЕДАЛЬ</div> <div style="text-align: justify;"> &nbsp;</div> <div style="text-align: justify;"> Отгонцэцэг Қазақстан азаматтығын алғаннан кейін халықаралық дзюдо федерациясы (IJF) оның 2013-2015 жылдары жинаған ұпайын түгел жойған. Осыдан кейін ол бір жылдың ішінде олимпиадаға қажетті ұпайды жинап, 48 килограмм салмақ дәрежесінде үздік 14 спортшының қатарына енуі тиіс еді.</div> <div style="text-align: justify;"> &nbsp;</div> <div style="text-align: justify;"> &ndash; Олимпиадаға баруға қажетті ұпай жинау үшін маған оннан астам халықаралық жарысқа қатысып, көбінде жүлде алу керек болды. 2015 жылдың тамызынан бастап Қазақстан құрамасымен 14 жарысқа бардым. Он медаль алдым, тек төртеуінде ғана жүлдесіз қалдым, &ndash; дейді спортшы.</div> <div style="text-align: justify;"> &nbsp;</div> <div style="text-align: justify;"> Отгонцэцэг биылғы жарыстарда бұрынғы отандасы Уранцэцэг Мөнхбатпен үш рет күресіп, үшеуінде де оны жеңген. Қазір ол 48 килограмм салмақ дәрежесі бойынша әлемдік рейтингте моңғолиялық Уранцэцэг Мөнхбат пен аргентиналық Паула Паретодан кейінгі орында &ndash; 3-орында тұр.</div> <div style="text-align: justify;"> &nbsp;</div> <div style="text-align: justify;"> &ndash; Олимпиададағы басты қарсыласым Уранцэцэг Мөнхбат болады. 2014 жылғы әлем чемпионы жапониялық Ами Кондо, 2015 жылғы әлем чемпионы аргентиналық Паула Парето, Лондон олимпиадасының чемпионы бразилиялық Сара Менезестерге де арнайы дайындаламын, &ndash; дейді Отгонцэцэг.</div> <div style="text-align: justify;"> &nbsp;</div> <div style="text-align: justify;"> Отгонцэцэцгпен бірге Қазақстанға оның жеке бапкері Энхбаатар Дашжамц та келген. Спортшы мен тренері барлық жарыстарға бірге дайындалып, бірге барып жүр.</div> <div style="text-align: justify;"> &nbsp;</div> <div style="text-align: justify;"> &ndash; Қазақстанның ішкі жарыстарында Шымкент қаласы атынан қатысамын. Мемлекет олимпиадаға дайындығыма барлық жағдайды жасап отыр. Алғашқы жаттығуымыз Түркияда өтеді. Одан кейін Алматыда дайындаламыз. Жанкүйерлер артқан сенімді ақтауға тырысамын, &ndash; дейді Отгонцэцэг.</div> <div style="text-align: justify;"> &nbsp;</div> <div style="text-align: justify;"> &laquo;БӘСЕКЕГЕ ҚАБІЛЕТТІ БАЛУАН ҚАЖЕТ БОЛДЫ&raquo;</div> <div style="text-align: justify;"> &nbsp;</div> <div style="text-align: justify;"> Отгонцэцэг Галбадрах келгенге дейін әлемдік жарыстарға Қазақстан атынан дзюдодан әйелдер арасында 48 килограмм салмақ дәрежесінде Александра Подрядова мен Айгүл Байқұлова барып жүрген. Құрамаға Галбадрах келгеннен кейін екі балуанның жарыстарға қатысуы азайған.</div> <div style="text-align: justify;"> &nbsp;</div> <div style="text-align: justify;"> Қазақстан әйелдер құрамасының бапкері Жәкен Саламатов Отгонцэцэгтің Қазақстан атынан халықаралық жарысқа қатысуы керек болғанын айтады.</div> <div style="text-align: justify;"> &nbsp;</div> <div style="text-align: justify;"> &ndash; Бізге бәсекеге қабілетті балуан қажет болды. Подрядова әлемдік жарыстарда жеңіске жете алмады, &ndash; дейді ол.</div> <div style="text-align: justify;"> &nbsp;</div> <div style="text-align: justify;"> Қазақстан дзюдо федерациясының өкілдері де Рио олимпиадасында Отгонцэцэгтен медаль күтетіндерін айтады. Дзюдодан Қазақстан әйелдер құрамасы олимпиада ойындарында медаль алып көрмеген.</div> <div style="text-align: justify;"> &nbsp;</div> <div style="text-align: justify;"> Риоға дайындалып жатқан Отгонцэцэг 2020 жылы Токиода өтетін олимпиадаға да Қазақстанның атынан қатысуды жоспарлап жүр.</div> <div style="text-align: justify;"> &nbsp;</div> <div style="text-align: justify;"> &ndash; Көбі мені биылғы олимпиададан кейін Моңғолияға қайта кетіп қалады деп ойлайды. Мен &ndash; Қазақстан азаматымын. 2020 жылғы олимпиадаға да Қазақстаннан барғым келеді, &ndash; дейді ол.</div> <div style="text-align: justify;"> &nbsp;</div> <div style="text-align: justify;"> Қазақстан 5-21 тамызда өтетін Рио-Де Жанейро олимпиадасына 100-ге жуық спортшы апаруды жоспарлайды. Қазір ел құрамасында 80-нен астам жолдама бар.</div> <div style="text-align: justify;"> &nbsp;</div> <div style="text-align: justify;"> Azattyq.org порталынан</div>