Дэвис кубогы кездесуінде Қазақстан құрамасы 2:1 есебімен алға шықты

<p style="text-align: justify;"> <strong>Белградта өтіп жатқан Дэвис кубогының 1/8 сайысында Сербия мен Қазақстан арасындағы үшінші, жұптық кездесуде Александр Недовесов пен Андрей Голубев Новак Джокович пен Ненад Зимоничпен шеберлік байқасты.</strong></p> <p style="text-align: justify;"> Қазақстандық жұп бұл матчта айды аспанға шығарып, 6:3, 7:6, 7:5 есебімен қарсыластарын үш партияда ұтты.</p> <p style="text-align: justify;"> Тамаша ойнаған А.Недовесов пен А.Голубев екінші партияда тай-брейкті өз есептеріне жазса, үшінші, шешуші сетте есеп 6:5 болып тұрған сәтте брейк жасап, кездесуді көп созбай, аяқтай білді. Үшінші партия барысында әлемнің бірінші ракеткасы Н.Джоковичтің қапаланғаны сондай, ракеткасын кортқа ұрып, сындырды.&nbsp;</p> <p style="text-align: justify;"> Сөйтіп, үш кездесуден кейін Қазақстан құрамасы 2:1 есебімен алға шықты. Қай құраманың ширек финалға шығатыны қалған екі ойында шешіледі. 6 наурыз күні алдымен Новак Джокович пен Қазақстанның бірінші, әлемнің 79-ыншы ракеткасы Михаил Кукушкин күш сынасса, содан кейін Александр Недовесов пен Виктор Троицки кортқа шығады. Осы екі кездесудің бірінде қазақстандық теннисші жеңсе, онда Қазақстан құрамасы келесі кезеңге жолдама алады.</p> <p style="text-align: justify;"> ҚазАқпарат</p>