Петр Ян Ислам Махачевтің қарсылас таңдау құқығы туралы пікір білдірді
UFC-дің ең жеңіл салмақтағы чемпионы Петр Ян промоушеннің қос белбеу иегері Ислам Махачевтің Карлос Пратеспен жекпе-жек өткізуден бас тартуына қатысты пікір білдірді, деп хабарлайды Prosports.kz.
Янның пікірінше, Махачевтің чемпиондық мәртебесі мен жетістіктері оған қарсылас таңдауда өз шарттарын қоюға толық құқық береді.
«Чемпионат» тілшісі Максим Яковлевке берген сұхбатында ресейлік файтер Махачевтің ұстанымы UFC-дегі қазіргі жағдайға толық сәйкес келетінін айтты.
«Иә, неге болмасын? Оның бұлай істеуіне белгілі бір себептері бар. Ол қарсыластарының әлі жеткілікті деңгейде өнер көрсетпегенін есептейді. Егер олар мықтыны анықтағысы келсе, өзара жұдырықтассын. Исламның қос чемпион болғандықтан осылай әрекет етуге құқығы бар ма? Иә, оған толық құқығы бар», – деді Петр Ян.
Ислам Махачевтің үміткерлерден чемпиондық белбеуге таласын жекпе-жекте дәлелдеуді талап етуіне оның мансабындағы жетістіктері негіз болып отыр.
Атап айтқанда, ресейлік спортшы 2022 жылы жеңіл салмақта (70 келіге дейін) чемпион атанып, титулын төрт рет қорғаған. Ал 2025 жылы жартылай орта салмақта екінші чемпиондық белбеуін жеңіп алып, екі дивизионның чемпионы атанды. Бұл салмақта да титулын бір рет қорғап үлгерді.
Айта кетейік, Ислам Махачев – жекпе-жек самбосынан әлем және Ресейдің бірнеше дүркін чемпионы. Ол ММА-де 2010 жылдан, ал UFC-де 2015 жылдан бері өнер көрсетіп келеді.
