«Локомотив» Полуниннің дубльінің арқасында «Адмиралды» жеңді

«Локомотив» Фонбет ҚХЛ тұрақты чемпионаты аясындағы матчта сырт алаңда «Адмиралды» жеңді. Владивостокта өткен кездесу ярославльдік команданың 2:1 есебіндегі жеңісімен аяқталды, деп хабарлайды Prosports.kz.

Ойынның басты кейіпкері Александр Полунин болды. Шабуылшы бірінші кезеңнің өзінде алаң иелерінің қақпасына екі шайба соқты.

Алдымен Полунин 12-минутта Максим Шалунов пен Денис Алексеевтің нәтижелі пасынан кейін есеп ашты. Арада бес минут өткенде шабуылшы тағы да дәл соққы жасап, дубль рәсімдеді. Бұл жолы оған Данил Романцев пен Алексеев нәтижелі пас берді.

«Адмирал» тек үшінші кезеңде ғана есеп айырмасын қысқартты. 51-минутта Семен Ибрагимов шайба соққанымен, владивостоктық команда есепті теңестіре алмады.

Осылайша, «Локомотив» бұған дейінгі матчта «Барыстан» 0:5 есебімен жеңілгеннен кейін реванш алды. Ярославльдік команда келесі кездесуін 25 қыркүйекте «Амурға» қарсы өткізеді.