Қазақстан Дүниежүзілік көшпенділер ойындарында алғашқы екі алтынын жеңіп алды

Қазақстан құрамасы Қырғызстанда өтіп жатқан VI Дүниежүзілік көшпенділер ойындарында алғашқы алтын медальдарын жеңіп алды, деп хабарлайды Prosports.kz.

Жарыс чемпиондары — Нұрталап Керім мен Сайлау Мұхамеджан.

Қазақстандық спортшылардың екі жеңісі де дәстүрлі ат үстіндегі күрес түрі — аударыспақтан келді. 60 келіге дейінгі салмақта Нұрталап Керім өнер көрсетті. Финалда қазақстандық спортшы Қырғызстан өкілімен сәтті белдесіп, чемпиондық атақты жеңіп алды.

Ал 70 келіге дейінгі салмақта алтын медальді Сайлау Мұхамеджан иеленді. Шешуші белдесуде ол қырғызстандық қарсыласынан 2:1 есебімен басым түсті.

Осылайша, дәл Керім мен Мұхамеджан Қазақстанға биылғы Дүниежүзілік көшпенділер ойындарындағы алғашқы екі алтын медальді сыйлады.