Қазақстандық теннисшілер Шымкенттегі турнирдің финалына жолдама алды

Қазақстандықтар Іңкәр Дүйсебай мен Сәтима Төреген жұптық сында Шымкент ITF W15 турнирінің финалына өтті, деп хабарлайды Prosports.kz тілшісі ҚазАқпаратқа сілтеме жасап.

Іңкәр 18-де, Сәтима 16-да болғанына қарамастан, жас теннисшілер жарыс барысында үш кездесуді де сәтті өткізді.

І.Дүйсебай – С.Төреген жартылай финалда жарыстың 4-ракеткалары, тағы бір қазақстандық Аружан Сағындықова мен ресейлік Элина Неплиймен сынға түсті.

Матчтың фавориттері қазақстандық-ресейлік дуэт саналғанымен, Іңкәр мен Сәтима камбэк жасап, супер тай-брейкте жеңісті жұлып алды – 2:6, 6:3, 11:9. Бәсеке сағат жарымға жуық уақытқа созылды.

Іңкәр Дүйсебай – Сәтима Төрегеннің финалдағы қарсыластары кейін анықталады.

Тағы бір қазақстандық жұп, 17 жастағы Әмір Омарханов пен Дамир Жалғасбай жартылай финалда германиялық Адриан Отцбах – бельгиялық Мартин Ван дер Мершенге жол берді – 2:6, 4:6.