2024 жылы ең көп табыс тапқан спортшылардың үздік ондығына екі боксшы енді
Ауыр салмақта WBC тұжырымы бойынша бұрынғы әлем чемпионы Тайсон Фьюри мен украиналық экс-абсолютті әлем чемпионы Александр Усик 2024 жылдың ең көп табыс тапқан спортшыларының үздік ондығына енді, деп хабарлайды Prosports.kz порталы MMA.Metaratings.ru-ға сілтеме жасап.
Рейтингті Sky Sports басылымы жариялады. Дереккөз мәліметінше, Фьюри 2024 жылы шамамен 146,1 миллион доллар табыс тапқан. Ал Усиктің кірісі – 120,9 миллион доллар.
Еске сала кетейік, өткен жылы Усик пен Фьюри екі мәрте рингте жолыққан. Бірінші жекпе-жекте украиналық боксшы төрешілердің бөлінген шешімімен жеңіске жетсе, қарымта кездесуде бірауыздан қабылданған шешіммен басым түсті.
Усиктің кәсіби мансабындағы көрсеткіші – 23 жеңіс (14 нокаут) және бірде-бір жеңіліс жоқ. Ал Фьюридің есебінде 34 жеңіс (24 нокаут), екі жеңіліс және бір тең нәтиже бар.