Осы жолы Жалоловтың салмағында қазақтар чемпион атанады – Қайрат Сәтжанов

Әуесқой бокста 92 келіден жоғары салмақта қазір «король» жоқ. Баходир Жалолов кәсіпқой боксқа ауысты, деп хабарлайды Prosports.kz 

Енді жаңа чемпион кім болады деген сұраққа «Бірінші бол» YouTube арнасына қонаққа келген Қайрат Сәтжанов жауап берді.

«Жақында Айбек Оралбай аса ауыр салмаққа ауысты. Ол әлі толық бабына келген жоқ. Соған қарамастан Шымкенттегі турнирде жеңімпаз атанды. Айбектің артықшылығы ауыр салмақтағы боксшылардың ішінде өте жылдам. Сосын сериялық соққылары көп. Алдағы Азия чемпионатында топ жаруға дайын», - дейді Қайрат Сәтжанов.

Маман Азия чемпионатында Айбекке тағы бір өзбек боксшысы басты қарсылас болуы мүмкін екенін тілге тиек етті.

«Баходур Жалолов боксты қойғанымен, Өзбекстанда ауыр салмақта Жахонгир Зокиров деген тағы бір жас жігіт бар. Жалоловпен спарринг жасап жүріп біраз тәжірибе жинады, Олимпиада ойындарына қатыспаса да, бірге барып жүрді. Деңгейі біраз өскен. Меніңше, алдағы Азия чемпионатында бұл баланы ұтуға шамамыз жетеді. Түсініксіз жайттар болып қалмаса, Айбек оны ұтады деп ойлаймын», - дейді бас бапкер.