Қырғызстан Қазақстан құрамасын көкпардан қарымта ойынға шақырды
Қырғыздар Қазақстан құрамасын көкпардан қарымта ойынға шақырды, деп хабарлайды Prosports.kz
V Дүниежүзілік көшпенділер ойындарында көкпардан Қазақстан мен Қырғызстан арасындағы ойын тартысқа толы болып, 5:4 есебімен отандастарымыз жеңіске жеткен.
Ойынның арты жанжалға ұласып, Қырғызстан құрамасы ойын шешімімен келіспейтіндерін жеткізген еді.
Бүгін белгілі болғандай, Қырғызстан көкбөрі федерациясының өкілдері Қазақстанға 1 қарашада қарымта кездесу өткізуді ұсынып отыр.
«Біз 1 қарашада сол баяғы құраммен көкбөрі мен көкпар ойнауды ұсынамыз. Бұл – спорт. Ойын екі халық арасында алауыздық тудырмауы тиіс. Біз халықтарымыздың келісімі үшін жеке амбициялардан бас тартуға дайынбыз. Төреші басқа елден болады», - деді көкбөрі федерациясының басшысы Рамис Жүнісалиев баспасөз мәжілісінде.
Бұл жарыс «Келісім кубогы» деп аталмақ. Олар 16 қыркүйекте Қазақстан көкпар федерациясына шақыру хат жіберген.