Париж-2024: Демеу Жадыраевтың әлемнің үздік балуанына қарсы жекпе-жегінің тікелей трансляциясы

Сәрсенбі, 7 тамыз күні Парижде (Франция) өтіп жатқан Олимпиада ойындарында қазақстандық грек-рим күресінің балуаны Демеу Жадыраев 77 келіге дейінгі салмақта финалда жапондық Нао Кусакамен кездеседі, деп хабарлайды Prosports.kz.

«Хабар» телеарнасының тікелей эфирі Астана уақытымен 21:10-да басталады. Жадыраев пен Кусака арасындағы жекпе-жек тоғызыншы жұп ретінде өтеді және 22:11-ге жоспарланған.

Нао Кусака 77 келіде Біріккен әлем күрес рейтингінің (UWW) көшбасшысы. Сондай-ақ жапондық 2023 жылғы әлем чемпионатының қола жүлдегері және 2024 жылғы Азия чемпионы.

Демеу Жадыраев 2017 жылғы әлем чемпионатының күміс жүлдегері және Азия чемпионатының төрт дүркін жүлдегері. Қазақстандық әлемдік рейтингте жетінші орында тұр.