Қазақстандық боксшы жеңілмеген спортшымен кездеседі

Қазақстандық боксшы Бек Нұрмағанбеттің (10-0, 8 КО) келесі жекпе-жегіндегі қарсыласы белгілі болды, деп хабарлайды Prosports.kz.

Suleimen Promotions промоутерлік компаниясының мәліметінше, 30 қыркүйекте Лас-Вегаста (Невада, АҚШ) Нұрмағанбет нигериялық Абимбола Осундайромен (5-0, 3 КО) жұдырықтасады. Жекпе-жек сегіз раундқа жоспарланған.

Шоудың басты оқиғасы супер орта салмақтағы абсолютті әлем чемпионы, мексикалық Сауль «Канело» Альварес мен бірінші орта салмақтағы барлық титулдардың иегері Джермелл Чарло арасындағы жекпе-жек болмақ. 

Бек Нұрмағанбет үшін алдағы жекпе-жек 2023 жылғы үшінші жекпе-жек болмақ. Ол өзінің алдыңғы шайқасын 6 мамырда Гвадалахарада (Мексика), сонымен қатар «Канело» жекпе-жегінің андеркартында өткізді, онда Бек жергілікті боксшы Аргенис Эспаньяны (15-2, 14 КО) екінші раундта техникалық нокаутпен жеңді.

Абимбола Осундайроға келсек, ол соңғы жекпе-жегін өткен жылдың желтоқсан айында өз елінде өткізді - көпшіліктің шешімімен отандасы Годдай Аппаны (12-2, 11 КО) жеңді.